出發....阿里山
今朝好早起身呀....4:45am....就起身...打算5:30am 出門口....坐6:30am 車去嘉義...點知又早咗搞掂....5:20am 就出門...咁早條街都未光..舖頭又未開...想食早餐都唔知可以係邊到食...而且我哋d 行李咁重...都唔想四周圍行 ...所以我哋一出酒店門口就跳咗上的士...直接去火車站....原來酒店去火車站要成NT100...你話我哋噚日行咗幾遠..重要負重....諗起都覺得恐怖....
坐的士...其實真係5分鐘就到....咁第一件事梗係買咗飛先la....再慢慢係麥當勞食返個早餐...好彩呢間麥當勞咁早開咋...如果唔係..咁早我哋都唔知可以去邊.....
呢到既早餐同香港唔同...無咁多花款....但價格就差唔多...最多平少少....但係呢到飲品就好大方....咁大杯鮮橙汁都唔駛加錢....係香港只係得個好細杯....其實仲可以揀其他飲品...好似cappuccino, Latte...不過因為我一陣想瞓覺...所以無飲咖啡....個早餐都幾好...味道同香港差唔多...但係個薯餅就好油...真係要改善...
因為無嘢做...而且又眼瞓....所以我哋都一直坐係麥當勞...咁慢慢開有d 人入嚟食早餐....其中一個大頭叔叔就坐咗係部點播機旁邊...不斷點歌....唔好睇佢好似老粗咁....佢原來都聽d 好 hit 既新歌....真係益咗我哋2個到聽免費歌....係香港都好耐無見過有地方有點播機...就算有都可能唔平....呢到點首歌只係NT10....都算好扺聽....
見無嘢早...就早d 去見台等....費事架車早到或有咩問題....去到月台...原來架車一早已經係到等....早知就再早d上車瞓 la...
呢條係行去月台既天橋....上面有好多壁畫...地面係油漆...中間有無見到...係d好得意既植物....連埋個盤..好似串燒3兄弟咁....勁搞笑....
你睇我哋2個嗰樣都未瞓醒....好似麵粉公仔....
到嘉義喇....越來越近阿里山 lu
坐咗1小時又20分鐘....終於到達去阿里山既中途站嘉義....其實我都無乜點瞓過...因為怕坐過站....其實見到嘉義個車站....就大約知道嘉義係個咩地方....因為真係有d 舊...同埋簡陋感覺都....一d 都唔似係過縣既長途火車站...
哈哈...今日終於有陽光....你睇我連眼都橕唔大...希望呢個太陽可以keep 住 la...我唔想再雨中慢步....
其實一行出前站就會見到阿里山森林鐵路售票處....一d 都唔難搵....正當我哋想埋去問上阿里山d 嘢既時候....有個阿嬸行埋嘢我哋身邊...問我哋係咪上阿里山?....訂咗酒店未?...如果未可以幫佢訂...會平d....正當我哋想話唔駛既時候...又有一個阿叔行埋嚟...話可以車我哋去呢間酒店....但我哋話想坐小火車去奮起湖先....玩完再上阿里山.....咁個阿叔就同我哋講話係奮起湖無車上阿里山....因為小火車由奮起湖去阿里山個段悙駛.....而且又無其他車上....叫我哋不如先上阿里山....第2日再去奮起湖....其實我哋都半信半疑...點會無車...的士都有掛...不過見佢哋2個你一句我一句咁....又話隨時都有車係阿里山落奮起湖...加上間酒店都係堅....(因為我出發前都有check 過呢間酒店) ....所以我哋就決定改變行程...先上阿里山...再去奮起湖.....
講真酒店就唔貴...NT1500...佢仲平咗NT300 俾我哋....而且租車都唔貴....同小火車一樣....NT400位....仲快d 添....都ok....反而最貴係睇日出既車...要NT300 位....其實都幾驚...因為酒店+睇日出要先俾NT600 訂金...但佢只係手寫張收據俾我....雖然話係酒店既單...但都有可能會係假....而且租車仲要全數俾晒錢先...而且又唔係即刻開得車....要等15分鍾....攞住2張所謂既車票....真係怕被人扼......俾完錢個刻...我都真係有衝動想打電話去呢間酒店確認下....不過最後都無咁做....心諗唔俾都俾咗la...都無辦法...
見又未上得車...我哋就去7-11買咗d 食物同飲品...因為怕會肚餓....話晒都要坐2個幾鍾....
呢架就係我哋租個架車 la...當然唔係得我哋2個 la...仲有2個人....唔係佢點回本....
其實係等上車既時候...都仲驚緊被人扼....因為15分鐘....佢2個都可以走得好遠la....但當見到阿司機叔叔...係車站裏面搵我哋上車嗰時...就知道佢無扼我哋...總算放心少少....但係一日未到阿里山...未到酒店我個心都係驚驚哋....
過山車嗎?
上阿里山條路....全程係山路...繞山而行....迂迴曲折....就連私家車都咁搖,,,左擺右擺...更何況巴士...或者小火車?.....簡直就好似坐過山車咁......雖然係咁...但係我哋2個都無理...照瞓...但係我哋個人就一直跟住架車左搖右擺...講真真係瞓得一d都唔舒服...而且仲可以話有d 辛苦....但係又無嘢做...d風景又唔靚...得d樹木....雖然瞓得唔淋都照瞌埋眼....
阿里山係最高既地方...中途我哋經過奮起湖同石棹....所以知道如果坐客運上得石棹...都已經行咗大部份既路程.....因為石棹距離阿里山都係半個鐘車程....唔怪得係石棹坐的士去阿里山上都係NT75....之前我哋仲以為的網友扼人.....
其實過咗奮起湖之後...我都唔係太瞓到...一直醒醒瞓瞓...去到後段都無瞓到...因為阿司機開始無聊同我哋傾計...但係好奇怪...明明知道我哋都唔識聽台語...都仲要講...搞到前面對情侶仲要幫我哋翻譯同傳話....不過我哋都好開心...因為佢以為我哋係大學生...放暑假去旅行....一d 都唔似已經出咗嚟做嘢....即係話我哋生得年青 la...
後記
之前仲好膽心唔知坐咩車上阿里山....應該話打完風唔知有無車上阿里山....點知一d都唔駛擔心...因為只要你企係小火車售票處前面就自然有人會兜搭你....而且價錢合理....加上我後來見過架小火車後...我絕對覺得坐包車係最舒服...而且最扺....當然如果係旺季...就可能要做多d 準備功夫...因為唔知會唔會隨時有車..同埋有酒店....
經過今朝之後...我覺得根本唔需要擔心自己會係台灣俾人扼....因為佢哋真係好實在...只係想做生意....唔係想扼錢...唔同係大陸隨時隨地都要防...就算係香港我都未必敢相信陌生人....雖然我未試過係香港做遊客...唔知d 香港人係點對d 遊客....但係我自己本人就有介心....
沒有留言:
發佈留言